Kínverjar skrefi nær Drekanum

Orkustofnun stefnir að því að úthluta þriðja olíuleitarleyfinu á Drekasvæðið í haust, -  til Eykons Energy og kínverska ríkisolíufélagsins CNOOC. Drög að leyfinu hafa nú verið send væntanlegum leyfishöfum til umsagnar og norskum stjórnvöldum verður svo gefinn kostur á þátttöku.

Fyrstu tveimur olíuleitarleyfunum í lögsögu Íslands var úthlutað í Ráðherrabústaðnum í byrjun þessa árs, að viðstöddum olíumálaráðherra Noregs. Úthlutun þriðja leyfisins, sem Þórarinn Sveinn Arnarson hjá Orkustofnun segir stefnt að í haust, ef ekkert óvænt gerist, er einnig talin marka tímamót að því leyti að þá mun einn af olíurisum heims í fyrsta sinn verða þátttakandi í olíuleitinni, kínverska ríkisolíufélagið CNOOC.

Það félag er hundrað sinnum stærra en öll hin félögin samanlögð sem áður hafa fengið leyfi og hefur burði til að standa eitt að öllum þáttum olíuleitar og vinnslu á hafsvæðum. Það var íslenska félagð Eykon Energy sem fékk Kínverjana til liðs við sig en Eykon er undir forystu þeirra Heiðars Más Guðjónssonar, Gunnlaugs Jónssonar og Norðmannsins Terje Hagevang.

Orkustofnun hefur nú lokið við að kanna fjárhagslega og tæknilega getu umsækjenda og hefur sent þeim leyfisdrögin til umsagnar. Geri þeir ekki athugasemd fyrir næstu mánaðamót verður norskum stjórnvöldum boðið að gerast 25 prósent aðilar að leyfinu enda er það á svokölluðu samvinnusvæði Íslands og Noregs á Jan Mayen-hryggnum. Norðmenn hafa síðan einn mánuð til að ákveða hvort þeir verði með en að því búnu verður leyfið formlega gefið út og er líklegt að það verði í október.