Hilmar Veigar hlaut UT verðlaun Ský 2013

Hilmar Veigar Pétursson, framkvæmdastjóri tölvuleikjafyrirtækisins CCP, hlaut í dag UT verðlaun Ský 2013. „Hilmar er einn þeirra sem hefur komið að og hvatt til hugmyndaauðgi í sprotastarfsemi og þannig tekið þátt í vexti tölvuleikjaiðnaðar á Íslandi og aðstoðað þar sem þeir hafa getað," segir í rökstuðningi valnefndar.

Hilmar, sem er tölvunarfræðingur, gekk til liðs við CCP árið 200 sem yfirmaður tækni´mala og varð framkvæmdastjóri árið 2004. Hann hefur leitt EVE Online verkefnið frá árinu 2003 og tekið virkan þátt í mótun vaxtar íslensks hugvits með setu í ýmsum stjórnum og ráðum sem tengjast upplýsingatækni og frumkvöðlastarfsemi.

Að mati valnefndarinnar hefur Hilmar verið óþreytandi í að vinna með og styðja menntastofnanir, allt frá grunnskólum og upp í háskóla.

„Hilmar er verðug fyrirmynd unga fólksins og sýnir svo ekki verður um villst að hægt sé að ná langt með þrautseigjunni og að ekkert gerist ef ekki er haldið af stað og haldið áfram þó að móti blási. Hann hefur einnig í gegnum starf sitt hjá CCP og samtökum upplýsingafyrirtækja aukið almennan áhuga á upplýsingatækni og nýsköpun."

Það var forseti Íslands, Ólafur Ragnar Grímsson, sem afhenti Guðrúnu E. Stefánsdóttur, eiginkonu Hilmars Veigars, verðlaunin á UTmessyunni sem nú stendur yfir í Hörpu en Hilmar er staddur erlendis starfs sinnar vegna.