Tíu verslanir fá áminningu

Tíu verslanir í Kringlunni fá áminningu frá Neytendastofu fyrir að vera ekki með verðmerkingar í lagi.

Fulltrúar frá Neytendastofu fóru í eftirlitsferð í sérvöruverslanir í Kringlunni fyrr í mánuðinum til að skoða hvort verðmerkingar inni í verslunum sem og í sýningargluggum væru sýnilegar.

Verslunareigendur eiga að hafa verðmerkingar skýrar og vel sýnilegar samkvæmt lögum um eftirlit með viðskiptaháttum og markaðssetningu og reglur um verðmerkingar og aðrar verðupplýsingar, hvort sem það er inni í verslun eða í sýningarglugga.

Flestar þeirra 108 verslana sem farið var í voru með verðmerkingarnar í lagi. Þó voru tíu verslanir sem voru það ekki.

Í verslunum Hygeu, Indiska, Kiss,  Morrow, Mýrinni, Zik Zak, Ígló og Auganu voru óverðmerktar vörur í sýningargluggum og hjá Blómabúðinni Kringlan, Islandia, Morrow og Hygeu voru vörur óverðmerktar í búðinni. Hygea og Morrow voru einu búðirnar með óverðmerktar vörur bæði í glugga og inni í verslun.

Munu verslanirnar fá bréf til áminningar um að laga verðmerkingar í verslunum sínum, eða  um 10% þeirra verslana sem skoðaðar voru. Að sögn Neytendastofu er þetta gríðarleg framför frá skoðun sem síðast var gerð mánaðarmót nóvember og desember 2010 þar sem 57 verslanir voru ekki í lagi.