Gistinóttum fjölgaði um 28% í desember

Gistinætur á hótelum í desember s.l. voru 88.700 samanborið við 69.300 í desember 2011. Þetta er 28% aukning milli ára.

Gistinætur erlendra gesta voru um 78% af heildarfjölda gistinátta í desember en gistinóttum þeirra fjölgaði um 30% samanborið við desember 2011. Á sama tíma voru gistinætur Íslendinga 21% fleiri en árið áður, að því er segir á vefsíðu Hagstofunnar.

Gistinóttum á hótelum fjölgaði í öllum landshlutum. Á höfuðborgarsvæðinu voru gistinætur 73.400 eða um 29% fleiri en í desember 2011. Á Norðurlandi fjölgaði gistinóttum um 58%, voru 3.500 samanborið við 2.200 í desember 2011. Gistinóttum á Suðurnesjum fjölgaði á milli ára um 35%, voru 3.000 samanborið við 4.000 í desember 2011.

Á samanlögðu svæði Vesturlands og Vestfjarða fjölgaði gistinóttum um 9% en þar var fjöldi gistinátta í desember 900. Á Suðurlandi voru 5.800 gistinætur á hótelum í desember sem er um 5% aukning samanborið við fyrra ár.

Gistinóttum á hótelum fjölgaði um 20% í fyrra. Gistinætur á hótelum í fyrra voru 1.786.000 samanborið við 1.486.100 árið 2011. Gistinóttum erlendra gesta hefur fjölgað um 22% á meðan gistinóttum Íslendinga hefur fjölgað um 14%.