Stefndi kannast ekkert við þennan Gunnar

„[S]tefna máls þessa er sögð hafa verið birt á heimili stefnda klukkan 21.18 að kvöldi föstudagsins 5. október 2012 fyrir einhverjum Gunnari Birkissyni, sem er sagður hafa verið staddur þar. Stefndi kannast ekkert við þennan Gunnar Birkisson.“

Svo segir í greinargerð Sigurjóns Þ. Árnason, fyrrverandi bankastjóra Landsbankans, í máli slitastjórnar bankans gegn honum og tveimur öðrum fyrrverandi starfsmönnum, Steinþóri Gunnarssyni og Yngva Erni Kristinssyni.

Í málinu, sem Fréttablaðið sagði frá í gær, er þremenningunum stefnt til að greiða þrotabúi Landsbankans 1,2 milljarða vegna kaupa bankans á bréfum í bankanum sjálfum, Eimskipum og Straumi frá nóvember 2007 og fram í júlí 2008.

Sigurður G. Guðjónsson, lögmaður Sigurjóns, byggir meðal annars á því í greinargerð sinni vegna málsins að krafan sé í raun fyrnd, enda hafi stefnan ekki verið birt Sigurjóni með lögmætum hætti síðasta haust. Fram kemur á birtingarvottorði stefnunnar að áðurnefndur Gunnar Birkisson hafi tekið við stefnunni á heimili Sigurjóns að Granaskjóli.

Sigurjón kveðst sem áður segir ekki kannast við manninn, sem hafi aukinheldur ekki haft samband við hann til að koma á hann stefnunni. Þá segir í greinargerðinni að Sigurjón hafi verið erlendis ásamt fjölskyldu sinni þegar stefnan eigi að hafa verið birt, húsið mannlaust og að af upptökum úr öryggismyndavélum að dæma hafi enginn komið að húsinu þennan dag.