Síldarvinnslan tók á móti tæplega 36.000 tonnum af kolmunna

Kolmunnavertíðinni er lokið hjá Síldarvinnslunni. Alls tók Síldarvinnslan á móti tæplega 36 þúsund tonnum af kolmunna á vertíðinni ef með eru talin 4.034 tonn af sjófrystum kolmunna sem landað var í frystigeymslur fyrirtækisins í Neskaupstað.

Fjallað er um vertíðina á vefsíðu Síldarvinnslunnar. Þar segir að vertíðin var ágætlega heppnuð, almennt fiskaðist vel á miðunum suður af Færeyjum en brælur voru þó óþægilega tíðar. Liðlega eitt hundrað þúsund tonn  af heildarkvótanum kom í hlut íslenskra skipa á vertíðinni.

Síldarvinnsluskipin Börkur og Beitir lögðu stund á kolmunnaveiðar og var afli þeirra sem hér segir: Börkur NK 8.960 tonn og Beitir NK 10.289 tonn.

Fiskimjölsverksmiðjur Síldarvinnslunnar í Neskaupstað og á Seyðisfirði tóku alls á móti 31.729 tonnum. Skipting aflans á milli verksmiðjanna var sem hér segir: Neskaupstaður 19.185 tonn og Seyðisfjörður 12.544 tonn.