Dansað fyrir Davíð Olgeirs

Davíð Þorsteinn Olgeirsson, 34 ára, var að spila fótbolta 14. febrúar síðastliðinn með félögum sínum í Reykjavík þegar hann fékk bolta í höfuðið sem olli heilablæðingu. Blæðingin hafði áhrif á talstöðvar og hreyfigetu Davíðs og hann lamaðist á hægri hlið líkamans.  Nú tveimur mánuðum síðar er Davíð í endurhæfingu á Grensásdeild alla virka daga og fer í helgarfrí heim á Bifröst til fjölskyldu sinnar þar sem þau hafa búsetu.

Framundan er löng og ströng endurhæfing og Davíð hefur nú þegar sýnt það að sannað að hann ætlar sér bara eitt og það er að ná fullum bata.  

Davíð starfar sem markaðsstjóri á Bifröst en konan hans, Tinna, er í námi þar. Þau eiga tvö börn, Elmar Daða 4 ára og Gabríelu 12 ára.  Davíð var eina fyrirvinna fjölskyldunnar og skyndilega er fótunum kippt undan þeim á einu augabragði.  Ótrúleg jákvæðni og gleði einkennir fjölskylduna en róðurinn sem framundan er verður erfiður fyrir þau. 

Nú ætla allir Zumbakennarar World Class að styrkja fjölskylduna með því að vera með svokallaðan ofur-Zumbatíma á föstudaginn en Ester Júlia Olgeirsdóttir þjálfari og Zumbakennari er systir Davíðs. 

Tónlistarmaðurinn Bogomil Font mun spila á bongotrommur í tímanum auk þess sem hann tekur þátt í tímanum af lífi og sál og dansar til styrktar Davíðs.   

Þá verður boðið upp á heilsudrykki og orkustangir og síðan en ekki síst verður dregið í happdrætti.  World Class lánar aðstöðuna endurgjaldslaust en kennararnir sem verða fimm gefa allir vinnuna sína.  

Ofur-Zumba-styrktartíminn verður klukkan 18:00 á föstudaginn næsta, 19 apríl, 100 mínútur að lengd og kostar 2000 krónur inn en upphæðin sem safnast rennur óskipt til Davíðs og fjölskyldu.  

Hægt verður að skrá sig í tímann hjá World Class en þeir sem vilja styrkja fjölskylduna geta lagt inn á styrktarreikning 0301-13-055783 kt. 281166-4419.