Myrkvi: Mjúk áferð með löngu eftirbragði

Nú nýverið bárust fréttir af góðu gengi Myrkva á World Beer Awards. Eins og við allar fréttir af sigrum Íslendinga hlýnaði smáþjóðarhjartanu og við færðumst aðeins nær því að verða aftur best í heimi.

En fréttin er merkilegri en virðist í fyrstu því Myrkvi vann til verðlauna í flokki kaffi- og súkkulaðibjóra - flokki sem enginn Íslendingur gat ímyndað sér að væri til hinn 1. mars 1989.

Í þessum flokki eru allar bjórtegundir sem innihalda kaffi eða súkkulaði en í Myrkva er að finna hið fyrrnefnda. 

Nafn bjórsins er ekki út í loftið, bjórinn er kolbikasvartur með þykka brúna froðu. Ilmurinn ber með sér þétta rist og skýra kaffitóna. Mjög gott jafnvægi er milli beiskju, sætu og sýru. Kaffið gefur svo lokahnykkinn - vel til staðar en ekki yfirþyrmandi. Myrkvi hefur mjúka áferð, sem hafrar hjálpa til við að skapa, og eftirbragðið er langt og einkennist af kaffi.

Í Myrkva tekst að feta hinn vandfarna gullna meðalveg. Bjórinn er í góðu jafnvægi á sama tíma og hann er áhugaverður og fer inn á óhefðbundnar slóðir.

Ef horft er á þróun veitingastaða landsins síðustu ár virðast Íslendingar vera til í allt - þræða hráfæðis-, hamborgara- og sushistaði eins og enginn sé morgundagurinn. Að stíga aðeins út fyrir bjór-þægindarammann ætti því ekki vera mikið vandamál og tilvalið fyrir allt kaffi-, bjór- og nýmetisfólk að ljúka góðri máltíð á Myrkva – til dæmis með eftirréttinum.

Fyrir hverja: Matgæðinga og kaffifólk

Ekki fyrir: Piña colada-þyrsta djammara

Staður og stund: Til að fullkomna máltíð eða rólega kvöldstund

Rangur staður: Kaffiþorsti á mánudagsmorgni

Úlfar Linnet er bjórsérfræðingur Vísis. Hann er stofnmeðlimur og virkur félagi í Fágun (Félagi áhugamanna um gerjun), sem eru fjölmennustu samtök bjóráhugamanna á Íslandi. Hann er fyrsti kennarinn og prófessor emeritus í Bjórskólanum.

 Úlfar verður með vikulega umfjöllun um bjór á Vísi.