Bundust samtökum um hagsmunagæslu

Sigurður Valtýsson, þáverandi forstjóri Exista og stjórnarmaður í Vátryggingafélagi Íslands (VÍS), átti beinna og verulegra hagsmuna að gæta af því að VÍS mundi bjarga eignarhaldsfélagi svila hans. Sigurður var sjálfur stærsti kröfuhafi félagsins.

Þetta kemur fram í ákæru sérstaks saksóknara á hendur Sigurði og Lýði Guðmundssyni fyrir umboðssvik og brot á hlutafélagalögum frá því síðla árs 2008 og fram í október 2009 þegar þeir sátu í stjórn VÍS.

Í fyrsta lagi er Lýður ákærður fyrir brot á hlutafélagalögum með því að veita Sigurði lán út úr VÍS, sem hæst stóð í 50 milljónum. Í 104. grein hlutafélagalaga er lagt bann við því að félag láni stjórnarmönnum sínum fé. Þá er Sigurður ákærður fyrir brot á sama ákvæði hlutafélagalaga, með því að veita Korki, félagi í helmingseigu Lýðs, ítrekað tugi milljóna. Skuld Korks við VÍS stóð hæst í um 140 milljónum króna.

Skuldir bæði Sigurðar og Korks voru greiddar upp að fullu og saksóknari metur það greinilega svo að aldrei hafi myndast fjártjónshætta sem hefði kallað á ákæru fyrir umboðssvik.

Að síðustu er Lýður hins vegar ákærður fyrir umboðssvik með því að hafa misnotað aðstöðu sína, farið út fyrir heimildir og stefnt fé VÍS í hættu þegar hann lét VÍS kaupa skuldabréf fyrir 24 milljónir af Kristjáni Gunnari Ríkharðssyni, svila Sigurðar, og annað 35 milljóna króna skuldabréf af félagi Kristjáns, Reykjanesbyggð ehf., og einnig þegar hann lét VÍS kaupa 40 prósenta hlut í Reykjanesbyggð ehf. á 150 milljónir.

Af þessum viðskiptum við Kristján hafði Sigurður sem áður segir beina hagsmuni, sem stærsti kröfuhafi Reykjanesbyggðar.

„Virðast ákærði Lýður og Sigurður Valtýsson, þá stjórnarmaður VÍS, hafa myndað með sér samtök um hagsmunagæslu þar sem hvor veitti öðrum af fé VÍS,“ segir í ákærunni. 

Þá segir að með öllu sé óljóst hvernig 150 milljóna kaupverðið á 40 prósenta hlutanum í Reykjanesbyggð hafi verið fundið út, meðal annars í ljósi þess að gerður hafi verið samningur um kauprétt VÍS að afgangi félagsins á 100 milljónir. „Sýnir það að engar viðskiptalegar forsendur lágu að baki kaupverðinu,“ segir í ákærunni. Í árslok 2011 hafði verðmæti þessa 40 prósenta hlutar VÍS verið fært niður í 75 þúsund krónur.

Ákæran verður þingfest í Héraðsdómi Reykjavíkur miðvikudaginn 30. október.