Vilja sæstrenginn fyrir 2020, fjárfestar mjög áhugasamir

Þróunarstjóri helsta raforkufyrirtækis Bretlands segir að sæstrengur milli Íslands og Bretlands geti verið tilbúinn innan sjö ára og hvetur stjórnvöld ríkjanna til að hefja nú þegar formlegar viðræður um verkefnið. Sorrý, segir Ragnheiður Elín við Bretana,- en Íslendingar verða í forgangi.

Sæstrengur er ein stærsta pólitíska og viðskiptalega ákvörðun sem Íslendingar standa frammi fyrir. Á fundi sem Bresk-íslenska viðskiptaráðið stóð fyrir á Hilton Nordica-hóteli í Reykjavík í morgun sagði talsmaður Landsnets þeirra Breta að nú væri rétti tíminn fyrir ríkisstjórnir landanna að koma að málinu, svo frekari undirbúningsvinna geti haldð áfram.

„Við þurfum að hefja viðræður á milli ríkisstjórnanna tveggja,“ segir Paul Johnson, þróunarstjóri National Grid, í viðtali í fréttum Stöðvar 2, en fyrirtækið hefur 28 ára reynslu í rekstri sæstrengja milli Bretlands og annarra landa.

„Ég ráðlegg íslensku ríkisstjórninni að reyna að styðja þetta, ná samkomulagi um verkefnið og kanna hvort ríkin geti orðið ásátt um verkáætlun sem geri sæstreng að veruleika fyrir árið 2020.” Báðir aðilar geti hagnast. Bretland sé að komast í þá stöðu að þurfa að finna orku fyrir 2020. Svona verkefni sé framkvæmanlegt innan þess tíma.

Hann segir að sæstrengur upp á 400-500 milljarða króna kalli á alþjóðlega fjárfesta og þá muni ekki skorta. National Grid hafi rætt við stóra fjárfestingarsjóði um sæstreng til Íslands. 

„Við höfum kynnt íslenska verkefnið sem hugsanlegan fjárfestingakost og ég get sagt í dag að það er mikill áhugi á að fjárfesta í þessu verkefni,” sagði Paul Johnson.

Ragnheiður Elín Árnadóttir iðnaðarráðherra kvaðst hafa fullan skilning á óþreyju Breta. „Ég efast ekki um áhuga og ákafa Breta í að leysa orkuvanda sinn, en í sannleika sagt er það skylda okkar að tryggja að íslenska orkustefnan þjóni íslensku þjóðinni fyrst og fremst. Þú verður að afsaka það,” sagði hún. 

Og þegar spurning kom úr sal hvort fyrst þyrfti afsökunarbeiðni frá breskum stjórnvöldum vegna hryðjuverkalaga gegn Íslendingum glettist ráðherrann: „Það gæti orðið fyrsta skrefið til að þoka þessu verkefni áfram.“