Endurskoðendur segjast hafa varað við viðskiptum Lýðs

Tveir endurskoðendur hjá Deloitte segjast hafa lagst gegn hlutafjáraukningu Exista í lok árs 2008. Frá þessu greindu þeir í skýrslutöku hjá sérstökum saksóknara þegar málið var til rannsóknar.

Lýður Guðmundsson, fyrrverandi stjórnarformaður Exista, hefur verið ákærður fyrir brot á hlutafélagalögum með því að greiða einungis einn milljarð fyrir hlut í Existu sem var 50 milljarðar að nafnvirði. Þá eru Lýður og Bjarnfreður Ólafsson lögmaður ákærðir fyrir að hafa vísvitandi skýrt rangt og villandi frá hækkun á hlutafé Exista þegar send var tilkynning til hlutafélagaskrár 8. desember 2008. Fyrirtaka var í málinu í Héraðsdómi Reykjavíkur í morgun og var eitt vitni leitt fyrir dóminn. Það var Hildur Árnadóttir endurskoðandi, sem var meðal annars stjórnarmaður í VÍS, Lýsingu, Bakkavör, Flögu, Lyfju og fleiri félögum.

Í máli Hildar í morgun kom fram að hún, sem endurskoðandi í stjórn Existu, hefði átt í samskiptum við Deloitte, sem var endurskoðendafyrirtæki Existu, í aðdraganda stjórnarfundar 4. desember þar sem ákvörðun um hlutafjáraukninguna var tekin. Deloitte var meðal annars fengið til að gera sérfræðingaskýrslu þar sem fjallað var um fyrirhugaða hlutafjáraukningu. Ólafur Þór Hauksson, sérstakur saksóknari, spurði Hildi hvaða afstöðu Deloitte hefði haft til hlutafjáraukningarinnar.

Ólafur vildi meðal annars vita hver afstaða Hilmars Alfreðssonar, endurskoðanda hjá Deloitte sem var endurskoðandi Existu, hefði verið til hlutafjáraukningarinnar. Ólafur las meðal annars upp úr skýrslu sem tekin var af Hilmari á rannsóknarstigi þar sem Hilmar fullyrti að Deloitte „gæti aldrei aldrei skrifað upp á þetta,“ eins og segir í skýrslunni. Þá sagði Ólafur að Þorvarður Gunnarsson, framkvæmdastjóri Deloitte, hefði tekið í svipaðan steng og Hilmar í skýrslutöku hjá sérstökum saksóknara.

Hildur sagðist ekki kannast við þessa afstöðu Deloitte. Hlutafjáraukningin hefði verið rætt fram og til baka við Deloitte áður en hún var rædd í stjórn Existu og Deloitte hefði síðan gert skýrslu sem kölluð var sérfræðingaskýrslan. Hildur segist telja að viðskiptin, þar sem greiddur var einn milljarður fyrir 50 milljarða nafnverðshlut í Kaupþingi, hafi ekki verið óeðlileg. Virði Exista verið mjög lítið eftir að helsta eign félagsins, Kaupþing, var hrunin.