Töluverð viðskipti með hluti í VÍS, hafa hækkað um 15%

Viðskipti með hlutabréf í VÍS hafa verið töluverð á morgni fyrsta viðskiptadags félagsins. Gengi félagsins stendur í 9,15 kr. á hlut sem er 15% hærra en gengi félagsins í A og B hluta útboðsins en það var 7,95 kr. á hlut.

Þetta kemur fram í Morgunkorni greiningar Íslandsbanka. Þar segir að ein flöggun kom í morgun vegna eignarhalds þegar tilkynnt var um 9,9% hlut Hagamels ehf. Í VÍS. Þegar þetta er skrifað er því einungis einn annar hluthafi en Klakki ehf. með meira en 5% hlut í félaginu. Listi yfir stærstu eigendur VÍS hefur ekki verið birtur en gera má ráð fyrir því að hann verði birtur síðar í dag.

"Athyglisvert verður að skoða hlutdeild lífeyrissjóðanna í VÍS en fyrir liggur að enginn lífeyrissjóður á umfram 5% hlut í félaginu eftir útboð, til samanburðar eiga þrír lífeyrissjóðir meira en 5% hlut í TM og lífeyrissjóðirnir eiga töluverðan hluta í Sjóvá í gegnum SF1,” segir í Morgunkorninu.

„Spurningin er hvort lífeyrissjóðirnir muni kjósa að eiga í öllum tryggingafélögunum eða veðji á ákveðinn hest. Þess fyrir utan er þó nauðsynlegt að líta til þess að seljendur VÍS höfðu fulla heimild til að velja eigendahóp félagsins, miðað við eðli starfsemi Klakka ehf. er þó líklegt að það val hafi að fullu byggst á verði. Í ljósi þeirra viðskipta sem verið hafa í dag er nauðsynlegt að hafa í huga að sá hluthafalisti sem birtur verður getur nú þegar hafa tekið töluverðum breytingum.”