Tíu vinsælustu bílar enskra knattspyrnumanna

Fjárskorturinn plagar ekki enska knattspyrnumenn og því eru þeir ekki sparir á aurinn þegar kemur að því að fjárfesta í bílum. Bílafloti þeirra er því ekki af lakari gerðinni og athyglivert að sjá hvað freistar þeirra mest.

Blaðið Nude í Englandi tók saman hvaða bílar það eru sem helst ganga í augu þeirra. Athygli vekur að efstir á blaði eru dýrir jeppar, en rándýrir ofursportbílar eru líka fyrirferðarmiklir á lista þeirra 10 vinsælustu.

Vinsælasti bíllinn er Range Rover enda fer þar heimabíll framleiddur í Englandi. Meðal eigenda Range Rover eru Wayne Rooney, Darren Bent, Juhn Terry, Luis Suarez, Rian Giggs og Scott Parker. Næst vinsælasti bíllinn er Porsche Cayenne, en meðal eiganda þess bíls eru Steven Gerrard, Kolo Toure og Manchester mennirnir Robin van Persie, Patrice Evra, Tom Cleverley og Chris Smalling.

Þriðji vinsælasti bíllinn er svo Audi Q7, en hann eiga t.d. Arsenal mennirnir Kieran Gibbs og Bacary Sagna, Fernando Torres, Luis Nani, Rio Ferdinand, Moussa Dembele og Emmanuel Adebayor.

Í næstu sætunum eru Sportbílarnir Aston Martin DB9, Bentley Continental, Porsche Panamera, Ferrari 458 en þannig bíl eiga fjórir úr Arsenal, Mathieu Flamini, Mesut Özil, Theo Walcott og Jack Wilshere. Áttundi vinsælasti bíllinn er Lamborghini Gallardo, svo Audi R8 og sá tíundi vinsælasti er Chevrolet Camaro, sá lang ódýrasti þeirra allra.