Lýsing má senda út innheimtu- og greiðsluseðla

Hæstiréttur hefur hafnað kröfu Hagsmunasamtaka heimilanna um að fá lögbann sett á útsendingu og innheimtu greiðsluseðla Lýsingar hf.

Í dómi Hæstaréttar segir að í yfirlýsingum Lýsingar felist næg trygging fyrir því að hagsmunir lántakenda séu ekki fyrir borð bornir og að Hagsmunasamtök heimilanna hafi ekki lagt fram haldbær gögn sem styðji að ástæða sé til að óttast um greiðslugetu félagsins, að því er segir í yfirlýsingu frá Lýsingu.

Hagsmunasamtök heimilanna hafa verið dæmd til að greiða Lýsingu samtals 750 þúsund krónur í málskostnað. Lýsing telur að þeir fjármunir eigi að gagnast þeim sem standa höllum fæti, eins og upphaflega hefur verið ætlast til, og hefur ákveðið að skipta þeim jafnt milli samtaka sem Lýsing styrkir, Samhjálpar annars vegar og Þroskahjálpar hins vegar, að því er segir í tilkynningunni.