Miklar líkur á samdrætti í landsframleiðslu

Líkur á samdrætti í landsframleiðslu hafa ekki verið meiri síðan árið 2007. Þetta kemur fram í Morgunblaðinu í dag þar sem vitnað er í leiðandi hagvísi Analytics, sem sinnir áhættu- og fjárfestingaráðgjöf.

Hagvísirinn lækkaði í ágúst, fjórða mánuðinn í röð, og þegar árið 2013 er skoðað í heild bendir hann til þess að hagvöxtur verði með lakara móti á árinu, eða um 1-2 prósent.

Morgunblaðið vitnar meðal annars í Þorstein Víglundsson, framkvæmdastjóra Samtaka atvinnulífsins, þar sem hann segir spá Analytics um hagvöxt á árinu ekki koma sér á óvart.

„Þetta samræmist því sem við höfum óttast að hafi verið að gerast. Það hafa verið ýmsi merki um að hagkerfið hafi verið að hægja á sér aftur en einnig hafa verið jákvæð teikn á lofti," segir Þorsteinn og vísar meðal annars í gott gengi íslenskrar ferðaþjónustu.