VÍS búið að selja hlut sinn í Vefpressunni

Vátryggingafélag Íslands, VÍS, seldi hlut sinn í Vefpressunni um mitt síðasta ár. Þetta staðfesti Sigrún Ragna Ólafsdóttir, forstjóri VÍS, við fréttastofu í dag.

Vátryggingafélag Íslands átti ríflega 18 prósent hlut í Vefpressunni, og sagði Sigrún Ragna að um óverulegar upphæðir hefði verið að ræða í viðskiptunum, og að hluthafar sem fyrir voru í hluthafahópi Vefpressunnar hefðu keypt hlutinn.

Eins og greint var frá fyrr í dag var Vefpressan, sem m.a. rekur Pressuna.is og eyjuna.is, rekin með tæplega 30 milljóna króna tapi árið 2011, samkvæmt ársreikninga sem skilað var til Ársreikningaskrá 7. janúar sl. Hann er óendurskoðaður.

Þetta er umtalsvert meira tap en árið 2010 en þá tapaði Vefpressan 7,2 milljónum. Eignir eru í reikningi metnar á um 140 milljónir króna, og eigið fé nemur 48,5 milljónum. Skuldir félagsins hækka mikið milli áranna 2010 og 2011, eða úr ríflega 20 milljónum í rúmlega 90 milljónir. Þar af eru skammtímaskuldir bróðurpartur skulda, eða ríflega 80 milljónir. Þar af er skammtímaskuld vegna yfirdráttarláns ríflega 35 milljónir.

Á vefsíðu Fjölmiðlanefndar, þar sem er að finna upplýsingar um eigendur tilkynningarskyldra fjölmiðla, koma fram aðrar upplýsingar heldur en í ársreikningi fyrir 2011. Samkvæmt þeim lista eru eigendur félagsins að fullu, neðangreindir aðilar. Eins og áður segir er VÍS þó farið úr hluthafahópnum, og hefur hann því tekið nokkrum breytingum, frá því upplýsingarnar voru birtar á vef Fjölmiðlanefndar.

Björn Ingi Hrafnsson, 18,58%

Vátryggingarfélag Íslands hf., 18,39%

Arnar Ægisson, 14,21%

AB 10 ehf., 13,92%

Salt Investments ehf., 12,97%

AB 11 ehf., 14,44%

Steingrímur Ólafsson, 1,3%

Guðjón Elmar Guðjónsson, 0,8%

Ólafur Már Svavarsson, 4,59%

Verksmiðjan Norðurpóllinn, 0,8%