SA: Verðbólga á niðurleið

Samtök atvinnulífsins segja mikilvægt að halda aftur af hækkun gjaldskráa og almennri verðhækkun á vöru og þjónustu í landinu svo hægt verði að halda verðbólgunni, sem nú er á niðurleið, í skefjum.

Í frétt sem birtist á vef samtakanna segir að þróun næstu mánaða ráðist af því hvort gengi krónunnar haldist stöðugt og hvort takist að ná „skynsamlegri niðurstöðu í kjarasamningum á vinnumarkaði.“

Þar segir jafnframt að þegar litið sé til síðustu 6 mánaða sé verðbólga reiknuð til árshækkunar um 1,9%.

„Vísitala neysluverðs hefur hækkað úr 409,9 stigum í 413,3 stig frá febrúar til ágúst á þessu ári.

Frá því í ágúst 2012 hækkaði neysluverðsvísitalan mest í september 2012 (0,8%) og í febrúar 2013 (1,6%). Þessar hækkanir stöfuðu fyrst og fremst af lækkun gengis krónunnar í fyrra tilvikinu og af almennum launahækkunum og hækkun gjaldskráa í seinna tilvikinu.

Mikilvægt er að komandi kjarasamningar stefni þessari þróun ekki í voða. Verðbólguþróunin undanfarna mánuði ýtir undir nauðsyn þess að skynsamlegir kjarasamningar náist á vinnumarkaði þar sem launahækkunum er stillt í hóf.

Það er allra hagur að halda verðbólgunni í skefjum. Það leiðir til minni hækkana verðtryggðra lána fólks og fyrirtækja og eykur líkur á því að niðurstaða kjarasamninga skili almenningi auknum kaupmætti,“ segir í fréttinni.