Hæstiréttur dæmir erlent lán Byggðastofnunnar löglegt

Hæstiréttur hefur dæmt að lán sem Byggðastofnun veitti í erlendri mynt, það er japönskum jenum, væri löglegt.

Fjallað er um málið í Byggðakorni stofnunarinnar. Þar segir að lánið var veitt Samvirkni ehf. á Akureyri í febrúar 2008 og var í japönskum jenum. Lánið nam um 45 milljónum jena. Hæstiréttur staðfestir þar með að Byggðastofnun hafi staðið rétt að lánveitingum í erlendum myntum. 

Hlutverk Byggðastofnunar er að vinna að eflingu byggðar og atvinnulífs á landsbyggðinni, m.a. með því að veita lán til uppbyggjandi verkefna víða um land. Rúmlega 60% af lánum stofnunarinnar eru í erlendri mynt og nýfallinn dómur Hæstaréttar er fordæmisgefandi fyrir um 90% þeirra. Skilmálar um 10% lánanna í erlendri mynt eru með öðrum hætti og nú er rekið mál fyrir Héraðsdómi Norðurlands vestra um lögmæti þeirra.

Byggðastofnun mun hér eftir sem hingað til leitast við að koma til móts við vanda skuldara sem lent hafa í vanda vegna hækkunar erlendra lána, að því er segir í Byggðakorninu.