Stjórnvöld stuðli að aukinni verðbólgu meðan samningar eru lausir

Framlag ríkisstjórnarinnar til þeirrar kjaradeildu sem nú er í hnút er ekki bara aukin verðbólga, heldur eyðileggur hún þá samstöðu sem þegar hafði skapast meðal fjölda sveitarfélaga um að hækka ekki gjaldskrár sínar.

Þetta kemur fram í ályktun sem miðstjórn ASÍ hefur sent frá sér. Verkalýðshreyfingin fór fram á það við ríki og sveitarfélög í haust að hætt yrði við gjaldskrárhækkanir um áramót til að skapa stöðugleika á grunni lágrar verðbólgu. Borgin og fleiri sveitarfélög hafi farið á undan með góðu fordæmi og dregið fyrirhugaðar hækkanir til baka.

Meirihluti efnahags- og viðskiptanefndar Alþingis hafi hins vegar sent frá sér „rökstuðning“ fyrir því að vera ekki samferða í vegferð gegn verðbólgunni og telur ASÍ að meirihlutinn vilji því að álögur á almenning hækki jafnt og þétt, annað bjóði hættunni heim.

Þannig muni boðaðar aðgerðir ríkisstjórnarinnar í skuldamálum heimilanna að öllum líkindum leiða til veikara gengis krónunnar sem kalli aftur á vaxtahækkanir Seðlabankans.