Kaupmáttur launa gæti aukist fram á haustið

Kaupmáttur launa hefur aukist talsvert á síðustu mánuðum vegna kjarasamningsbundinna launahækkana og styrkingar krónu. Nemur kaupmáttaraukningin frá áramótum 1,9%. Haldi krónan núverandi styrk gæti kaupmátturinn aukist enn frekar fram á haustið, sem væntanlega myndi hjálpa til við að landa hóflegri hækkun nafnlauna í komandi kjarasamningum undir lok árs.

Þetta kemur fram í Morgunkorni greiningar Íslandsbanka. Þar segir að kaupmáttur launa mælist nú svipaður og hann var á öðrum ársfjórðungi 2006. Hins vegar gæti þróunin næstu ársfjórðunga orðið nokkuð önnur en raunin var á sama tíma í fyrra.

Frá marsmánuði 2012 fram til síðustu áramóta minnkaði kaupmáttur launa um 0,4%, enda hækkaði verðlag í landinu nokkuð meira en sem nam launaskriði. Nú er hins vegar útlit fyrir að vísitala neysluverðs lækki í apríl, og ef krónan veikist ekki verulega að nýju fyrir haustið lítur út fyrir að verðlag hækki fremur lítið fram undir vetur. Kaupmáttur gæti því aukist nokkuð til viðbótar fram eftir árinu, jafnvel þótt launaskrið reynist hóflegt.

Ef sú verður raunin og verðbólguhorfur haldast þokkalega jákvæðar mun það væntanlega minnka þrýsting á verulega nafnlaunahækkun til að ná fram kaupmáttaraukningu í komandi kjarasamningum, en núverandi samningar eru lausir í nóvemberlok á þessu ári. Hófsamir kjarasamningar myndu svo aftur bæta verðbólguhorfur til meðallangs tíma, enda skiptir launaþróun verulegu máli fyrir innlendan verðþrýsting.

Ekki er þó sopið kálið fyrr en í ausuna er komið, og rétt að hafa í huga að ýmislegt getur gengið á fram að kjarasamningunum í haust, að því er segir í Morgunkorninu.