Eyþór ráðinn framkvæmdastjóri Icelandic Japan

Dr. Eyþór Eyjólfsson hefur verið ráðinn framkvæmdastjóri Icelandic Japan. Hann tekur við starfinu af Jónasi Engilbertssyni sem mun flytja heim til Íslands og taka við starfi framkvæmdastjóra Innkaupa Icelandic Group. Breytingarnar taka gildi 1. ágúst nk. Að því er segir í tilkynningu um málið.

„Með þessum breytingum viljum við styrkja starfsemi okkar í Japan og auka samstarf dótturfyrirtækja Icelandic í innkaupum. Ætlun okkar er að efla verulega markaðssetningu íslenskra sjávarafurða á hraðvaxandi mörkuðum Asíu," segir Magnús Bjarnason, forstjóri Icelandic Group í tilkynningunni.

Eyþór Eyjólfsson hefur undanfarin ár starfað sem framkvæmdastjóri Stolt Sea Farm Iceland en fyrirtækið hefur verið að byggja upp fiskeldi sem notar lágvarma úr jarðhitavirkjunum á Reykjanesi  til framleiðslu á Senegalflúru til manneldis.

Eyþór hefur um langt árabil haft margvísleg tengsl við Japan og Asíu.  Hann tók þátt í uppbyggingu Coocon í Tokyo  sem  var selt til Stolt Seafarm 1996.  Starfaði síðan m.a. sem framkvæmdastjóri Stolt Seafarm í Asíu með aðsetur í Japan sem var leiðandi í sölu á sjávarafurðum í Asíu. Á árunum 2005-2007 var Eyþór framkvæmdastjóri og meðeigandi  Salmar Japan og byggði upp sölu á lax og öðrum vörum fyrir það fyrirtæki i Japan en fluttist þá heim.

Eyþór er með doktorsgráðu í japönskum málvísindum frá Ludwig Maximilans University í München og nam að auki við háskólana í Hiroshima og Moskvu. Eyþór var kjörræðismaður Íslands í Tokyo á árunum 1998-2009.