Óvissa um áform ríkisins

„Ákveðin óvissa ríkir um áform í opinberum fjármálum,“ vitnaði Már Guðmundsson seðlabankastjóri í ákvörðun peningastefnunefndar um stýrivexti á kynningarfundi bankans í gær.

Í yfirlýsingu nefndarinnar er áréttað mikilvægi þess að jöfnuður náist sem fyrst á ríkissjóði þannig að samspil stefnunnar í peninga- og ríkisfjármálum stuðli með sem minnstum tilkostnaði að ytra jafnvægi þjóðarbúsins, efnahagslegum stöðugleika og verðbólgu í samræmi við markmið.

„Miðað við þá stöðu sem við erum nú í er auðvitað heppilegast að hafa þetta samspil þannig að ríkisfjármálastefnan sé aðeins aðhaldssamari og þá hægt að hafa aðeins slakari peningastefnu vegna þess að það þýðir að raungengi krónunnar verður þá lægra en ella.“

Lægra raungengi samrýmist markmiðum um efnahagslegan stöðugleika og verðbólgu um leið og viðskiptaafgangur getur orðið meiri.

„Og það er ekki gott ef peningastefnan og ríkisfjármálastefnan fara að toga of mikið í sitt hvora áttina,“ sagði Már, en bætti um leið við að ekki væru sérstök merki um slíkt.

Már rifjaði einnig upp varnaðarorð bankans í janúar um að undirstöður tekjuhliðar fjárlaga kynnu að vera ekki nógu traustar. Seðlabankinn hafi haft af því áhyggjur að útkoman yrði eitthvað verri en að hafi verið stefnt.

Hvað framhaldið varðaði þyrfti að bíða framvindunnar við gerð nýrra fjárlaga. Þá áréttaði Már að aðhaldssöm stefna í ríkisfjármálum væri líka mikilvæg vegna losunar fjármagnshafta.

„Því þegar þau verða losuð þá verður lánsfjármögnun ríkissjóðs erfiðari og dýrari.“ Hvað varðar breytingar á áætlun um losun gjaldeyrishafta sagði Már stöðugt unnið að endurskoðun á þeirri áætlun.

„Spurningin er bara hvenær verður gefin út ný skýrsla og það verður náttúrulega ekki gert nema í samvinnu við nýja ríkisstjórn.“ Framvinduna sagði Már að stórum hluta ráðast af því hvernig farið yrði að með bú föllnu bankanna.

„Það verður að einhverju leyti að koma fyrst, þótt hægt sé að vinna samhliða að mjög mörgu. Við höldum áfram útboðunum og undirbúum ýmislegt sem boðað var í síðustu áætlun.“

Þar á meðal er könnun lagalegra skilyrða útgöngugjalds, eða -skatts sem kynni að verða lagður á og varúðarreglurnar sem Seðlabankinn hafi boðað.

„Losun fjármagnshafta er miklu meira ein einhver tæknileg fiff varðandi einhver útboð. Þetta er spurningin um Ísland í heild sinni.“

Stýrivextir óbreyttir en hagvöxtur óljós

Stýrivextir Seðlabanka Íslands eru óbreyttir samkvæmt ákvörðun peningastefnunefndar bankans. Sjö daga veðlánavextir eru 6,0 prósent.

„Nefndin bendir á að hagvöxtur virðist hafa verið heldur minni á fyrsta fjórðungi ársins en bankinn spáði í Peningamálum í maí,“ sagði Már Guðmundsson seðlabankastjóri í gær.

Of snemmt væri þó að fullyrða að hagvaxtarhorfur fyrir árið í heild hafi versnað. „Fyrir það fyrsta eru hagvaxtartölur oftar en ekki endurskoðaðar frá fyrstu tölum, en því til viðbótar benda nýjustu tölur um eftirspurn til þess að efnahagsbatinn sé í samræmi við spá bankans,“ bætti hann við.