Ólafur taldi viðskiptin góð fyrir bankann

Aðalmeðferð í Al Thani málinu hélt áfram í morgun. Ólafur Ólafsson, einn hinna ákærðu, gaf skýrslu fyrri dómi.

Ólafur átti stóran eignarhlut í Kaupþingi banka á tímanum fyrir hrun en sagðist fyrir dómi í dag hvorki hafa setið í stjórn eða verið starfsmaður bankans.

Hann lýsti aðkomu sinni að upphafi viðskiptasambands Kaupþings banka og Sjeiks Mohammed Al Thani sem Ólafur átti milligöngu um.

Ólafur sagðist ekki hafa átt að njóta neins hagnaðar af viðskiptunum og aldrei hafi komið til tals að njóta yfirráða arðs eða vaxta af þeim. Ólafur hafi á þessum tíma ekki séð neina áhættu fyrir bankann samfara þessum viðskiptum og taldi viðskiptin góð fyrir bankann.

Ólafur sagðist hafa stofnað fjárfestingafélag með Al Thani sem átti að fara í margvíslegar fjárfestingar og á þeim tíma hafi bankanum þótt áhugavert að eiga viðskipti í Katar.

Málið snýst um einkahlutafélag í eigu Sjeik Mohammed Al Thani keypti um 5,01 prósenta hlut í Kaupþingi, í lok september 2008. Kaupþing fjármagnaði kaupin að fullu en Al Thani skrifaði undir 12,5 milljarða króna sjálfskuldarábyrgð. Sérstakur saksóknari vill meina að hér hafi verið um sýndarviðskipti að ræða til að blekkja markaðinn og um leið styrkja stöðu Kaupþings. Því hafna sakborningar í málinu, en ásamt Ólafi eru ákærðir þeir Hreiðar Már Sigurðsson, Sigurður Einarsson og Magnús Guðmundsson fyrir markaðsmisnotkun, umboðssvik, hylmingu og peningaþvætti.

Skýrslutöku af Ólafi lauk klukkan rétt rúmlega ellefu í morgun en því næst verða teknar skýrslur af vitnum en yfir 50 vitni hafa verið boðuð fyrir dóminn við aðalmeðferðina sem gert er ráð fyrir að standi yfir í tæpar tvær vikur.