HB Grandi og Valka sömdu um kaup á nýrri beinskurðarvél

HB Grandi og Valka undirrituðu á sjávarútvegssýningunni í Brussel í síðustu viku kaupsamning á nýrri röntgenstýrðri beinaskurðarvél en þetta er fyrsta vél sinnar tegundar í heiminum sem er ætluð til skurðar á þorskflökum. Vélin var sýnd í fyrsta skipti opinberlega á sýningunni.

Í tilkynningu segir að HB Grandi tók þátt í að þróa fyrstu beinaskurðarvélina með Völku og hefur sú vél verið í notkun í fiskiðjuveri HB Granda í Reykjavík frá því í september í fyrra. Sú vél er notuð til að skera beingarð úr karfaflökum auk þess sem hnakkabitar eru skornir sjálfvirkt í vélinni.

Nýja vélin verður notuð til að skera beingarð úr þorskflökum og að skera flakið í bita eftir óskum kaupenda. HB Grandi hefur ákveðið að auka þorskvinnslu á Akranesi og mun  nýja vélin  stuðla að auknum afköstum og nýtingu í bitaskurði.  Fyrirtækin eru saman í þróunarverkefni sem gengur út á að bæta nýtinguna enn frekar með hallandi skurði en það verkefni er styrkt af AVS-sjóðnum og Tækniþróunarsjóði.

Þess má geta að  HB Grandi hlaut nýverið Útflutningsverðlaun forseta Íslands og Valka hlaut Nýsköpunarverðlaunin sem veitt eru af Rannís, Nýsköpunarmiðstöð Íslands, Nýsköpunarsjóði og Íslandsstofu.