Húsnæðisverð á landsbyggðinni rauk upp í kosningamánuðinum

Óvenjulega mikil hækkun húsnæðisverðs á landsbyggðinni í mælingu Hagstofu er helsta skýring á því að vísitala neysluverðs hækkaði um 0,2% í apríl frá fyrri mánuði, þvert á spár um lækkun eða óbreytta vísitölu. Vísitala neysluverðs án húsnæðis lækkaði hins vegar um 0,13% milli mánaða í apríl. Þrátt fyrir nokkra hækkun neysluverðsvísitölunnar nú hjaðnar verðbólga töluvert í aprílmánuði, fer úr 3,9% niður í 3,3%.

Markaðsverð húsnæðis hækkaði í apríl um 1,8% á milli mánaða. Greining Íslandsbanka segir að þvílík hækkun milli mánaða hafi ekki sést á þessum lið síðan á þensluárinu mikla 2007. Verð á sérbýlum á höfuðborgarsvæði hækkaði um 1,8%, en verð fjölbýla á höfuðborgarsvæðinu lækkaði hins vegar lítið eitt. Á móti því vó hins vegar 8,6% hækkun húsnæðisverðs á landsbyggðinni. Greining segir að sú hækkun hafi komið verulega á óvart, enda hafi svo mikil mánaðarhækkun ekki sést í tölum Hagstofu svo langt aftur sem þær ná, eða til síðustu aldamóta.

Þá hækkaði greidd húsaleiga um 1,7% í apríl, sem er óvenju mikil hækkun og tengist væntanlega því að mikil hækkun VNV í febrúar kemur fram í verðtryggðum leigusamningum með töf.