Fór inn í bílskúr til þess að kasta upp

Elín Inga Bragadóttir þróaði með sér átröskun við tólf ára aldur.

Elín Inga segir Harmageddon frá reynslu sinni af átröskun sem hún sigraðist á með aðstoð fagfólks og vina.

Hægt er að hlusta á upptöku af viðtalinu hér að ofan.

Elín æfði mikið af íþróttum sem barn og segist hafa byrjað að þróa með sér sjúkdóminn þegar hún og vinkonur hennar fóru að setja sér strangar reglur um mataræði til að ná betri árangri. Smátt og smátt fór hún svo að ganga lengra en vinkonurnar og á endanum var hún farin að ljúga að fjölskyldu sinni til þess að komast hjá því að borða með þeim morgunmat.

„Ég man eftir því að hafa einhvernvegin, af því að ég komst ekki inn á baðherbergi, farið inn í bílskúr og kastað upp í fötu. Þetta er geðsjúkdómur. Þetta eru ekki rökréttar hugsanir sem þú ert að hugsa, en ef viljinn er fyrir hendi þá eiginlega tekst manni að fela rosa margt“.

Í tilfelli Elínar Ingu var það móðir hennar sem að áttaði sig á því hvað væri að og það var fyrir tilstilli hennar sem Elín Inga leitaði sér aðstoðar á barna og unglingageðdeild Landspítalans.