Kippur í skóverslun í janúar

Smásöluvísitala Rannsóknarseturs verslunarinnar var birt í dag. Fram kemur að velta jókst í dagvöruverslun um 1,2% á föstu verðlagi í janúar miðað við sama mánuð í fyrra og jókst um 6,2% á breytilegu verðlagi. Leiðrétt fyrir árstíðabundnum þáttum jókst velta dagvöruverslana í janúar um 0,6% frá sama mánuði í fyrra. Verð á dagvöru hefur hækkað um 5,0% á síðastliðnum 12 mánuðum.

Þá dróst áfengissala saman um 0,8% í janúar miðað við sama mánuð í fyrra á föstu verðlagi og jókst um 1,4% á breytilegu verðlagi. Leiðrétt fyrir árstíðabundnum þáttum jókst velta áfengisverslunar í janúar um 0,4% frá sama mánuði í fyrra. Verð á áfengi var 2,2% hærra í janúar síðastliðnum en í sama mánuði í fyrra.

Fataverslun minnkaði um 1,3% í janúar miðað við sama mánuð í fyrra á föstu verðlagi en jókst um 0,4% á breytilegu verðlagi á sama tímabili. Leiðrétt fyrir árstíðabundnum þáttum minnkaði velta fataverslunar í janúar um 3,9% frá sama mánuði í fyrra. Verð á fötum hækkaði um 1,8% frá sama mánuði fyrir ári.

Velta skóverslunar jókst um 25% í janúar á föstu verðlagi og um 11,2% á breytilegu verðlagi miðað við sama mánuð fyrir ári. Verð á skóm lækkaði um 11,0% frá janúar í fyrra.

Aukning var á veltu húsgagnaverslana um 4,9% í janúar frá sama mánuði fyrir ári á föstu verðlagi og um 10,4% á breytilegu verðlagi. Verð á húsgögnum var 5,2% hærra í janúar síðastliðnum miðað við sama mánuð í fyrra. Velta í sölu skrifstofuhúsgagna jókst um 11,1% í janúar síðastliðnum samanborið við sama mánuð ári fyrr á föstu verðlagi. Þá jókst velta sérverslana með rúm um 57,4% á föstu verðlagi.

Í liðnum um verðlag og neyslu kemur fram að útsölur í janúar hafi gengið misvel. Þannig jókst velta í skóverslun um fjórðung að raunvirði miðað við janúar í fyrra, enda lækkaði verð á skóm um 11% á þessu tímabili. Velta í fataverslun dróst hins vegar saman um 1,3% að raunvirði frá janúar í fyrra.

Fataverslun virðist eiga erfitt um vik og hefur ekki náð sér á strik allt frá hruni. Þá vekur athygli að velta hjá sérverslunum með rúm í janúar jókst um 57,4% að raunvirði á milli ára. Ætla má að meiri endurnýjunarþörf sé í rúmum en almennt í húsgagnaverslun, sem sýndi hægari vöxt í janúar.

Velta í dagvöruverslun heldur áfram að þokast uppávið eins og allt síðasta ár. Sömuleiðis hefur vöxtur í veltu áfengisverslunar verið hægur en stöðugur síðustu mánuði. Að þessu sinni var ekki birt veltuvísitala raftækjaverslana eins og verið hefur. Ástæðan er vinna sem nú fer fram við endurnýjun vísitölunnar.

Greiðslukortavelta heimilanna í desember var 8,6% meiri í janúar síðastliðnum en í sama mánuði í fyrra. Athygli vekur að kortavelta útlendinga hér á landi í janúar jókst um 55,8% frá janúar fyrir ári. Þannig greiddu útlendingar um 4,7 milljarða króna í janúar hér á landi með greiðslukortum sínum, samkvæmt tölum Seðlabanka Íslands. Þessi upphæð samsvarar 8,4% af því sem heimili landsins greiddu með greiðslukortum sínum hér á landi í síðasta mánuði.