Tíu hleðslustöðvar bætast við

Forsvarsmenn BL, Nissan í Evrópu og Orkuveitu Reykjavíkur undirrituðu fyrir helgi samning um uppsetningu tíu nýrra hraðhleðslustöðva fyrir rafbíla.

Reiknað er með að fyrstu stöðvarnar verði komnar í gagnið í haust en á hleðslustöðvunum munu eigendur rafbíla eins og Nissan Leaf geta hlaðið rafhlöður bílanna á hálfri klukkustund í stað fjögurra stunda með heimahleðslustöð.

Markmið samstarfsins er að stuðla að aukinni útbreiðslu og notkun rafbíla á Íslandi. Endanleg ákvörðun um staðsetningu stöðvanna verður tekin á næstu vikum og mánuðum og verður haft í huga að þær auki vegalengdirnar sem hægt er að aka á rafbílum hérlendis.