FME vísaði 11 málum til sérstaks árið 2012

Fjármálaeftirlitið hefur vísað tæplega 100 málum til embættis sérstaks saksóknara frá hruni. Af því 21 máli sem eftirlitinu barst frá Kauphöllinni í fyrra hafa fjögur mál verið tekin til rannsóknar.

Fjármálaeftirlitið (FME) vísaði alls ellefu málum til embættis sérstaks saksóknara á síðasta ári. Engin þeirra mála voru send til eftirlitsins frá Kauphöll Íslands en fjögur þeirra eru enn í rannsókn. Þetta kemur fram í svari FME við fyrirspurn Markaðarins um málið.

Greint var frá því í síðustu viku að Kauphöllin hefði vísað 21 máli til FME á síðasta ári. Átta þeirra mála voru vegna gruns um markaðsmisnotkun og tvö vegna gruns um ólögleg innherjaviðskipti. Í svari sínu um afdrif málanna sem Kauphöllin sendi segir FME að fjögur þeirra hafi farið í rannsókn, skoðun sé ólokið á sjö málum en lokið í 14 málum.

Því er ljóst að tíu mál sem tekin hafa verið til skoðunar hafa ekki verið rannsökuð frekar. FME hefur enn sem komið er ekki vísað neinu þeirra mála sem komu frá Kauphöllinni í fyrra til embættis sérstaks saksóknara. Í svari FME segir einnig að eftirlitið vilji taka fram að „Kauphöll sendir mál til frekari skoðunar hjá Fjármálaeftirlitinu ef hún sér einhver frávik. Á þeim geta svo reynst fullkomlega eðlilegar skýringar. Eðlilegt er því að tala um ábendingu í þessu sambandi. Ábendingar geta svo í einhverjum tilvikum leitt til rannsókna".

Í síðustu ársskýrslu FME, sem birt var í lok október 2012, segir að formlegum rannsóknum eftirlitsins á meintum efnahagsbrotum í aðdraganda fjármálaáfallsins haustið 2008 hafi lokið um áramótin 2012-2013. Í október 2012 hafði FME lokið rannsókn á alls 167 málum. „Alls hafa 49 mál tengd aðdraganda hrunsins verið kærð til efnahagsbrotadeildar ríkislögreglustjóra eða embættis sérstaks saksóknara. Jafnframt hefur 34 málum, þar sem um er að ræða meint brot á almennum hegningarlögum, verið vísað til embættis sérstaks saksóknara." Umrædd brot eru í öllum flokkum brota. Þremur málum var lokið með sektum og 81 máli án aðgerða. Frá síðustu áramótum mun rannsóknarteymi FME einungis rannsaka samtímamál. Samhliða hefur verið fækkað í teyminu.