Spá 1,7 prósenta hagvexti á árinu

Hagvöxtur verður 1,7 prósent á þessu ári og 2,7 prósent á því næsta gangi eftir spá Hagstofu Íslands. Í dag komu út Hagtíðindi Hagstofunnar, Þjóðhagsspá að sumri.

Spáin nær til áranna 2013 til 2018. „Einkaneysla eykst minna í ár en í fyrra og fjárfesting dregst saman um 3,6 prósent. Á næsta ári er gert ráð fyrir að einkaneysla taki betur við sér og verði 3,0 prósent en fjárfesting aukist um 14,1 prósent,“ segir í umfjöllun Hagstofunnar.

Samneysla er sögð aukast um hálft prósent á þessu ári, standa í stað 2014 til 2015. Eftir það aukist hún hægt.

„Vöxtur einkaneyslu og bati á vinnumarkaði var góður á fyrri helmingi 2012 en slakari á seinni hlutanum,“ segir á vef Hagstofunnar og bent á að á fyrri helmingi 2013 hafi vinnumarkaður styrkst talsvert, en einkaneysla aukist hægt.

„Verðbólguhorfur hafa batnað allnokkuð en viðskiptakjör hafa versnað lítillega. Fjárfesting eykst á spátímanum að árinu 2013 undanskildu.“

Hagstofan gaf síðast út þjóðhagsspá 12. apríl, en næsta spá á að koma í nóvember.

Þjóðhagsspá Hagstofu Íslands, sumar 2013.