Vilja stuðla að aukinni umræðu um viðskiptasiðfræði

Siðvís er ný rannsóknarmiðstöð um viðskiptasiðfræði sem stofnuð var á dögunum. Starfsemi rannsóknarmiðstöðvarinnar fellur undir ábyrgð stjórnar og er Elmar Hallgríms, lektor í viðskiptafræðideild Háskóla Íslands, stjórnarformaður hennar.

Elmar segir að mikilvægt sé að auka vægi siðferðilegrar nálgunar í viðskiptum og stuðla að frekari rannsóknarvirkni á sviði viðskiptasiðfræði.

Miðstöðin er starfrækt í samstarfi við Viðskiptafræðistofnun Háskóla Íslands og segir Elmar miðstöðina vera afar mikilvæga fyrir skólann vegna þess að með henni er verið að skapa vettvang fyrir rannsóknir á sviði viðskiptasiðfræði á ólíkum fræðisviðum.

Rannsóknarmiðstöðin leggur einnig áherslu á að tengjast atvinnulífinu, bæði með aðkomu stjórnar af mismunandi sviðum atvinnulífsins og með því að koma með hagnýtar afurðir sem hægt er að nýta með beinum hætti í atvinnulífinu.

Elmar telur að traust og trúverðugleiki sé lykilatriði í rekstri fyrirtækja og að aukin vitund stjórnenda um mikilvægi siðferðilegrar hugsunar í ákvarðanatöku stuðli að slíku.