Kanadísk fyrirsæta sakar Kanye um framhjáhald

Kanye West á að hafa haldið framhjá óléttri Kim Kardashian með kanadískri fyrirsætu eftir tónleika rapparans í fyrrasumar.

Hin 24 ára fyrirsæta, Leyla Ghobadi, sagði við tímaritið America‘s Star að fundir þeirra Kanye hefðu byrjað í júlí í fyrra. Fundirnir hefðu svo haldið áfram, þrátt fyrir að Kim og Kanye ættu von á frumburði sínum.

Slúðurmiðlarnir vestanhafs höfðu lengi vel velt sambandi þeirra Kim og Kanye fyrir sér, en rapparinn gaf það út að sambandið væri alls ekki gert fyrir fjölmiðlana eða sem einhverskonar auglýsing. Þau væru ástfangin.

„Þetta á algjörlega eftir að eyðileggja Kardashian-fjölskylduna. Þetta er slæmt, mjög slæmt. Þetta er bara vandræðalegt. En ef ég væri í sporum Kim, með barn á leiðinni, myndi ég vilja vita þetta,“ er haft eftir fyrirsætunni.

Heimildamenn Kim þvertaka fyrir að nokkuð sé satt í þessum efnum en heimildamenn Kanye hafa ekkert gefið frá sér enn.

Sagan segir að Kanye hafi fyrst komið auga á kanadísku fyrirsætuna meðal áhorfenda á tónleikum sínum í Atlantic City í fyrra. Hann hafi þá beðið starfsmann sinn um að finna stúlkuna og bjóða henni að hitta sig baksviðs, þrátt fyrir að Kim væri einnig viðstödd tónleikana. Kanye á þá að hafa boðið Leylu út í drykki og þaðan upp á hótelherbergi sitt.

Það kvöld hafi Leyla neitað að fara heim með rapparanum en hann þá tekið sig til og boðið fyrirsætunni og vinkonum hennar á tónleika sína kvöldið eftir. Hann gaf þeim öllum baksviðspassa og sagði við Leylu að samband hans og Kim væri ekkert nema fjölmiðlabrella. Leyla fór því með Kanye upp á hótelhergi hans. „Við kysstumst í smá stund. Allt í einu vorum við bæði nakin og farin að stunda kynlíf,“ segir Leyla.

Næsti fundur þeirra Leylu og Kanye var í New York í október en þá var Kim stödd í Miami og hafði á þeim tímapunkti ekki tilkynnt um óléttuna.

Leyla segir Kanye hafa haft samband við sig um síðustu helgi en fyrirsætan þá þvertekið fyrir að hitta hann, þar sem hún væri meðvituð um að parið ætti von á barni.