Gylfi sáttur við kjarasamninga og vísar gagnrýni á bug

Gylfi Arnbjörnsson, forseti Alþýðusambands Íslands, segir að þeir kjarasamningar sem voru undirritaðir um helgina séu afgerandi betri heldur en það sem atvinnulífið hafði mótað sér stefnu um. Hann vísar þeirri gagnrýni á bug að samningarnir henti láglaunafólki mjög illa.

Aðildarsamtök Alþýðusambands Íslands og Samtök atvinnulífsins undirrituðu á laugardag kjarasaming til tólf mánaða. Laun hækka um 2,8 prósent en þó að lágmarki um 8 þúsund krónur. Lágmarkslaun hækka um tæplega 10 þúsund krónur.

Fimm aðildarfélög Starfsgreinasambandsins skrifuðu ekki undir samningana en forystumenn þeirra hafa gagnrýnt þá harðlega.

Gylfi Arnbjörnsson, forseti Alþýðusambands Íslands, vísar þessari gagnrýni á bug.

„Í fyrsta lagi er þessi gagnrýni af hálfu fimm formanna félaga sem samtals telja um 4 prósent af aðildarfélögum Alþýðusambandsins. Hún er ekki meiri en það. Í öðru lagi stóðum við frammi fyrir því að Samtök atvinnulífsins höfðu markað sér þá stefnu að lægstu laun ættu að hækka um 4 þúsund krónur. Það er rétt að það voru tilteknir sem vildu að launahækkanir yrðu meiri. Tuttugu þúsund króna hækkun á töxtum og reyndar enn meiri hækkanir á þá tekjulægstu. Síðan fórum við í þessar viðræður og þær eru búnar að vera erfiðar og strangar. Við náðum því marki okkar að hækka lægstu laun  um sirka 10 þúsund og almenn laun hækkka um 2,8 prósent. Auðvitað er það þannig að maður hefði viljað ganga lengra en það er alveg klárt að miðað við það sem atvinnurekendur voru að bjóða hér í allt haust þá náðum við að breyta og snúa því og landa þessari niðurstöðu fyrir okkar félagsmenn sem er afgerandi meiri og betri heldur en það sem í boði var,“ segir Gylfi.