Ljóst.is birtir ný gögn um lánveitingar hjá Glitni

Um misskilning var að ræða þegar hlutir Bjarna Benediktssonar í Glitni voru taldir sem íslenskar krónur í skjölum sem uppljóstrunarsíðan Ljóst.is birti í gær. Þetta kemur fram í bréfi frá aðstandendum síðunnar.

Vegna þessa hafa aðstandendur síðunnar ákveðið að birta lista sem notaður var innanhúss hjá Glitni yfir helstu lánveitingar til einstaklinga og fyrirtækja dagsett í september árið 2008.

Fram kom í fjölmiðlum í gær og í morgun að uppljóstrunarsamtökin Associated Whistle-Blowing Press hefði birt gögn úr Glitni frá því rétt fyrir hrun. Á síðunni er sagt að skjölin geymi upplýsingar um stærstu lántakendur bankans, hagsmunaaðila og hreyfingu á hlutabréfum árin 2007 og 2008. Í einu skjalanna er sagt að Bjarni Benediktsson fjármálaráðherra hafi fengið tæpa 6 milljarða að láni hjá bankanum en ekki 174 milljónir eins og fram kom í skýrslu rannsóknarnefndar Alþingis árið 2010.

Þar eru einnig birt skjöl sem eiga, samkvæmt Ljóst.is, að sýna fram á að Glitnir hafi greitt fyrir persónuleg útgjöld Bjarna Ármannssonar, fyrrverandi bankastjóra Glitnis.

„Það var vissulega um misskilning að ræða varðandi skjalið „Loans.pdf“, þar sem hlutir í bankanum voru taldir vera íslenskar krónur,“ segir í bréfi frá Pedro Noel og Santiago Carrion, ritstjórum Ljóst.is. „Þökk sé blaðamönnum sem yfirfóru gögnin og tóku eftir þessu. Ljóst.is birti #Glitnisgögn með það að markmiði: að fólk geti rannsakað og túlkað þau að eigin vild.“

Í bréfinu segja þeir að frekari rannsókn verði að eiga sér stað. „Við vonumst til að blaðamenn, yfirvöld og almenningur, sem eru vel upplýstir um það sem gerðist á Íslandi, geti rannsakað málið. Gögnin sem við fengum um Glitni eru almennt mjög nákvæm og ofgnótt smáatriða - sum staðfest af fólki sem koma fyrir í sjálfum gögnunum. Það er mikilvægt og verður að taka með í reikninginn að Ljóst.is birtir ekki töluvert magn gagna til að upplýsa ekki um hagi þriðja aðila.“