Semja um framlengingu á gjalddaga skuldabréfs

Fjármála- og efnahagsráðuneytið og Seðlabanki Íslands hafa samið um framlengingu á gjalddaga skuldabréfs sem ríkissjóður gaf út í lok árs 2008 til að styrkja eigið fé Seðlabankans í kjölfar falls íslensku bankanna.

Eftirstöðvar skuldabréfsins nema nú rúmum 171 milljörðum króna og er það á gjalddaga 1. janúar 2014. 

Bæði bankinn og ráðuneytið sendu frá sér fréttatilkynningar vegna samningsins. Í þeim segir að þau hafi undanfarin misseri unnið að endurskoðun á ýmsum þáttum er varða fjárhagsleg samskipti Seðlabankans og ríkissjóðs, meðal annars varðandi viðmiðanir um eigið fé bankans og arðgreiðslur til ríkissjóðs.

„Samkomulag er um að ljúka þeirri vinnu fyrir lok febrúar 2014 þannig að hægt verði að leggja fram á vorþingi frumvarp sem nær til breytinga á þeim ákvæðum laga um Seðlabankann sem þetta varðar. Í ljósi niðurstöðu þeirrar vinnu verða á sama tíma teknar ákvarðanir um endanlega skilmála skuldabréfsins," segir í tilkynningu Seðlabankans.