Sprengdu 1.679 metra á árinu

Framkvæmdir við Vaðlaheiðargöng í Eyjafirði og Norðfjarðargöng við Eskifjörð eru á áætlun og ganga vel. Um sex mánuðir eru síðan sprengingar hófust í Eyjafirði og göngin eru nú 1.371 metri að lengd. Norðfjarðargöng eru 308 metra löng en fyrsta formlega sprenging þeirra fór fram um miðjan nóvember.

„Göngin hafa lengst um 55 metra á viku að meðaltali en mestu afköstin voru 83 metrar. Það hefur verið lítið af vatni og bergið er gott og verkið er nú sex vikum á undan áætlun,“ segir Valgeir Bergmann, framkvæmdastjóri Vaðlaheiðarganga hf.

40 manns starfa við gangagröft Eyjafjarðarmegin. Þar er unnið á vöktum allan sólarhringinn, alla daga vikunnar, en starfsmenn eru nú í tveggja vikna jólafríi. Um 15-20 manns bætast við næsta sumar þegar jarðgangagerð hefst Fnjóskadalsmegin.

„Það tekur tíma að slípa mannskapinn til en samvinnan eykst með hverjum metra og því má gera ráð fyrir að metið verði slegið á næsta ári,“ segir Valgeir og heldur áfram:

„Við höfum ekki lent í neinum alvarlegum töfum fyrir utan eina viku í nóvember þegar við lentum á tíu metra sprungusvæði. Það er ekkert óeðlilegt að það taki lengri tíma að fara í gegnum sprungur en í jarðfræðirannsóknum sem gerðar voru í undirbúningi ganganna er gert ráð fyrir um fjörutíu sprungum. Við höfum hins vegar einungis rekist á eina og það er mjög gott því við ættum að vera búin að fara í gegnum átta sprungur,“ segir Valgeir.

Hann segist hafa andað léttar þegar vinnuvélar fóru framhjá stóru vatnsbóli sem liggur fyrir ofan fyrstu þúsund metra ganganna.

„Menn voru hræddir um vatn fyrsta kílómetrann því við erum fyrir neðan vatnslind Halllands og menn óttuðust að við gætum lent í því að þurrka upp vatnsbólin. En það slapp og við erum komnir framhjá því svæði og dýpra inn í fjallið,“ segir Valgeir.

Guðmundur Þór Björnsson, hjá verkfræðistofunni Hnit, sem fer með umsjón og eftirlit með framkvæmdum vegna Norðfjarðarganga, segir gröftinn hafa farið rólega af stað.

„Við lentum strax á veikburða rauðu millilagi sem varð þess valdandi að við fórum hægt af stað. En undanfarið hefur verið rífandi gangur og í síðustu viku lengdust göngin um 66 metra. Eftir jólafrí verður bara borað og sprengt og vonandi verðum við ekkert í of flóknu fjalli,“ segir Guðmundur og hlær.

Fundu bergkristalla í göngunum 

Verktakar fundu nýverið hringlaga holu þakta bergkristöllum í Vaðlaheiðargöngum. Þar var um að ræða svokallað trjábolafar.

„Trjábolaför myndast þegar hraun rennur yfir skóg og fellir tré sem þá kolast og þá verður eftir hola. Það sem er merkilegt við þetta far er að það stendur upp í loft en vanalega liggja þau flöt,“ segir Halldór G. Pétursson, jarðfræðingur hjá Náttúrufræðistofnun.

„Svona holur fundust einnig í Héðinsfjarðargöngum og Ólafsfjarðargöngum. Þetta er víða í þessum basalthraunlögum frá þeim tíma þegar barrskógar þöktu landið,“ segir Halldór.