Akranesbær tekur yfir Sementverksmiðjureitinn

Fulltrúar Akraneskaupstaðar, Sementsverksmiðjunnar ehf. og Arion banka undirrituðu í dag samning um að Akraneskaupstaður eignist nú þegar Sementsverksmiðjureitinn í bænum að mestu leyti. Um er að ræða bæði mannvirki og lóðaréttindi. Þetta kemur fram í tilkynningu frá bæjarstjórn Akraneskaupstaðar.

Samningaviðræður hófust í haust að frumkvæði Sementsverksmiðjunnar en eigendur og viðskiptabanki félagsins töldu gjaldþrot blasa félaginu að óbreyttu. Sementsverksmiðjan heldur áfram hluta reitsins til starfrækslu sementsinnflutnings næstu 15 árin. Þá mun verksmiðjan leigja nokkur rými verksmiðjunnar næstu tvö árin.

„Þegar verður verið hafist handa við að huga að skipulagsmálum reitsins og málið reifað á íbúaþingi á Akranesi 18. janúar 2014. Kanon arkitektar undirbúa þingið í umboði bæjarins. Þar er ætlunin að kynna ýmsar tillögur að nýtingu svæðisins og kalla eftir fleiri hugmyndum. Undirbúningur þingsins hófst áður en viðræður hófust um samkomulagið sem nú er orðið staðreynd,“ segir í tilkynningunni.

Um er að ræða 55 þúsund fermetra svæði í hjarta bæjarins og hagsmunir bæjarfélagsins eru miklir. „Með samkomulaginu fær Akraneskaupstaður fullt forræði yfir svæðinu til skipulagningar og ráðstöfunar mun fyrr en ella. Án samninga hefði óvissa ríkt um ráðstöfun stórs hluta svæðisins auk mögulegs gjaldþrots Sementsverk-smiðjunnar.“

Boðað hefur verið til íbúafundar þann 18. janúar, sem markar upphaf vinnu við skipulagsferli reitsins. Það felst í hugmyndasamkeppni og í nánu samráði við íbúa Akraness. „Bæjaryfirvöld binda miklar vonir við að í þessari uppbyggingu takist vel til og að hér sé eitt besta byggingar- og útivistarland við Faxaflóa sem allt er á móti suðri við sjávarströnd,  nánast í miðjum bænum,“ segir í bókun bæjarstjórnar Akraness í dag.