7,8 milljóna króna sjónvarp

Samsungsetrið hefur flutt inn 85 tommu Samsung S9 Ultra HD snjallsjónvarp úr 9 línunni.

Tækið er að sögn framleitt í mjög takmörkuðu upplagi og hefur Samsungsetrið tryggt sér örfá tæki í sölu.

„Okkur bauðst að fá þetta tæki í sölu fyrir jólin og ákváðum við að slá til þrátt fyrir verðið þar sem þetta er alveg magnað tæki og raunar alveg einstakt hvað varðar tækni og hönnun. Tækið er bæði gríðarlega stórt og með ótrúlega góð hljóð- og myndgæði. Þetta er eins og að skyggnast inn í framtíðina. Tækið býður upp á allt það fullkomnasta sem völ er á í dag og í því er gríðarlega öflugur örgjörvi þannig að tækið er öflugt í allt vefvafstur í gegnum Smart Hub,“ segir Skúli Oddgeirsson verslunarstjóri í Samsungsetrinu.

Fjóra tæknimenn þarf til að setja tækið upp samkvæmt ströngustu fyrirmælum frá Samsung. Sjónvarpið kostar 7,8 milljónir króna en dýrustu sjónvarpstækin á markaðnum hér landi hafa kostnað í kringum 2 milljónir segir í yfirlýsingu frá Samsungsetrinu.

Tækið er með 4K upplausn og og Precision Pro Black tækni frá Samsung sem tryggja á afar fullkomin myndgæði. Tækið er með Ultra HD og Quad Core örgjörva og er 1000Hz og býr yfir öllum tækninýjungum sem Samsung hefur kynnt undanfarinn misseri og er meðal annars hægt er að nota radd- og handahreyfingar til að stjórna tækinu og mögulegt að flytja efni á milli sjónvarpsins, spjaldtölvu og snjallsíma.

„Þetta er eina tæki sinnar tegundar á Íslandi og það er þegar selt en við eigum rétt á að selja nokkur tæki í viðbót þannig að sjálfsögðu er hægt að panta svona tæki í Samsungsetrinu en það er nokkra vikna afgreiðslufrestur. Kaupandinn hefur samþykkt að tækið verði til sýnis í í Samsungsetrinu fram í janúar,“ segir Skúli en fyrirtækinu er ekki heimilt að gefa upp hver kaupandinn þar sem það er trúnaðarmál.