Kristján Freyr Kristjánsson hættir sem framkvæmdastjóri Klak Innovit

Kristján Freyr Kristjánsson hefur sagt starfi sínu lausu hjá Klak Innovit að eigin ósk.

Kristján hefur starfað hjá félaginu í fimm ár, þar af um þrjú sem framkvæmdastjóri. Kristján verður fyrirtækinu áfram innan handar sem ráðgjafi og hluthafi.

„Síðustu ár hafa verið viðburðarrík í starfsemi félagsins og stýrir það nú alls 13 verkefnum sem styðja við frumkvöðla- og sprotafyrirtæki hér á landi og erlendis. Má þar nefna stærri verkefni á borð við StartUpReykjavik, Gulleggið, Atvinnu-og Nýsköpunarhelgar og Seed Forum. Síðustu misseri hefur verið uppgangur hjá Klak Innovit og orðið viðsnúningur á rekstri félagsins sem stendur nú traustum fótum. Kristján er ungur og kraftmikill leiðtogi sem hefur verið unun af að starfa með,“ segir Þorsteinn G. Gunnarsson, stjórnarformaður Klak Innovit.