Vodafone gagnstefnt af Símanum

Vodafone stefndi Símanum fyrir héraðsdómi Reykjavíkur til greiðslu skaðabóta vegna brota á samkeppnislögum á árunum 2001 til 2007, þann 1. nóvember síðastliðinn. Fyrir ofrukkun á lúkningargjöldum. Þetta kemur fram í tilkynningu frá Vodafone. Síminn hefur nú gagnstefnt Vodafone.

„Brotin fólust í ofrukkun á lúkningargjöldum sem innheimt voru fyrir hverja talaða mínútu í símtölum sem enduðu í farsímakerfi Símans. Ofgreiðslur Vodafone vegna þessa námu 913 milljónum króna á tímabilinu og krafðist félagið þess að fá þá upphæð endurgreidda auk vaxta. Kröfugerð Vodafone byggir m.a. á niðurstöðu Samkeppniseftirlitsins og áfrýjunarnefndar samkeppnismála,“ segir í tilkynningunni.

Nú hefur Síminn gagnstefnt Vodafone fyrir sambærilegan meintan ólögmætan verðþrýsting á sama tímabili. Krafa Símans á Vodafone er að fjárhæð 2,5 milljarðar króna. „Sá grundvallarmunur er á stefnum Símans og Vodafone, að stefna Vodafone á hendur Símanum fær stoð í niðurstöðu Samkeppniseftirlitsins og áfrýjunarnefndar samkeppnismála, en kröfugerð Símans á hendur Vodafone gerir það ekki,“ segir í tilkynningu frá Vodafone.

Síminn hefur farið frá á að dómsmálin tvö verði sameinuð í eitt. „Vodafone ítrekar að óvissa ríkir um niðurstöðu dómsmálsins. Tapi Vodafone dómsmáli þessu mun það hafa neikvæð áhrif á rekstur félagsins en vinni Vodafone málið mun það, líkt og áður hefur komið fram, hafa jákvæð áhrif á fjárhag félagsins.“