Mikil pressa og hasar fyrir jólin

„Okkar stærsta tímabil er nú hafið af fullum þunga. Heildarfjöldi sendinga fer upp um þrjátíu til fjörutíu prósent í þessum mánuði og stærstu dagarnir eru tvöfaldir á við hefðbundna daga,“ segir Atli Freyr Einarsson, framkvæmdastjóri DHL Express á Íslandi.

„Þetta er mikil pressa og hasar en þetta eru aðstæður sem við þekkjum og höfum farið í gegnum margsinnis áður.“

Atli segir að stór hluti sendinganna innihaldi vörur innlendra verslana sem fara í sölu fyrir jólin.

„Við urðum vör við að jólaösin byrjaði aðeins seinna í ár en venjulega. Hún hefur yfirleitt hafist í lok október eða byrjun nóvember en byrjaði í ár ekki fyrr en í lok nóvember,“ segir Atli og bætir því við að annar stór hluti sendinga innihaldi jólagjafir sem Íslendingar senda út.

Atli áætlar að um 18-20 prósent af heildarsendingum ársins fari í gegnum fyrirtækið í desembermánuði.

„Í ofanálag hefur orðið sprenging í fjölda sendinga frá erlendum vefverslunum,“ segir Atli. Hann segir að sendingum frá slíkum síðum hafi fjölgað um þrjátíu prósent á þessu ári. Þar er um að ræða sendingar á vörum af ýmsum toga; bókum, bílavarahlutum, fatnaði, húsgögnum, tölvuleikjum og snyrtivörum.

„Við höfum þurft að laga okkur að þessu því hver tilraun til afhendingar eykur okkar kostnað. Við höfum til dæmis komið með nýjung sem er fólgin í því að að við sendum sjálfvirkt sms til þeirra sem eiga sendingar hjá okkur þar sem við látum viðkomandi vita að við munum koma sendingunni til þeirra þann daginn.“