Þriðjungur Íslendinga ræður ekki við einfaldan vaxtaútreikning

Um þriðjungur Íslendinga ræður ekki við einfaldan vaxtaútreikning. Þetta kemur fram í könnun sem Samtök fjármálafyrirtækja (SFF) fengu markaðsrannsóknafyrirtækið MMR til að framkvæma.

Í tilkynningu SFF um niðurstöður könnunarinnar segir að spurningar hennar hafi verið byggðir á spurningakönnum sem gerð hefur verið í fjölda vestrænna ríkja og því séu niðurstöðurnar samanburðarhæfar.

Um 70 prósent aðspurðra gátu svarað spurningu um hversu mikil ávöxtun verður á fimm árum á sparifjárreikningi sem ber tveggja prósenta ársvexti. Það er að sögn SFF sambærileg niðurstaða og fékkst þegar sama spurning var borin upp í bandarískri könnun.

„Meira en 80% aðspurðra gátu svarað spurningunni rétt í könnunum sem voru gerðar í Hollandi og Þýskalandi. Athygli vekur að það er sama hlutfall og þegar niðurstaða könnunarinnar fyrir aldurshópinn 18-29 hér á landi er skoðuð. Hlutfallið er lægra en hjá þeim sem eldri eru. Íslendingar virðast hinsvegar hafa ágæta tilfinningu fyrir raunvöxtum og verðbólgu samkvæmt könnuninni. Um 80% gátu svarað rétt að virði peninga á bankareikningi rýrnar þegar verðbólga er hærri en vextir á reikningnum. Um 78% aðspurðra svöruðu slíkri spurningu rétt þegar kannanir voru gerðar í Þýskalandi og Hollandi. Um 60% svöruðu rétt í sambærilegum könnunum í Bandaríkjunum og Japan

Einnig var spurt um áhættu. Um 55% aðspurða töldu áhættuminna að fjárfesta í hlutabréfasjóði frekar en í hlutabréfum einstaka fyrirtæki. Er þetta sambærileg niðurstaða og fékkst í Bandaríkjunum og í Hollandi. Í Þýskalandi var hlutfallið 62% en 40% í Japan,“ segir í tilkynningu Samtakanna.