Benedikt ráðinn aðstoðarmaður fjármálaráðherra

Benedikt Gíslason hefur verið ráðinn aðstoðarmaður fjármála- og efnahagsráðherra. Störf Benedikts fyrir ráðherra munu meðal annars snúa að ráðgjöf um framkvæmd áætlunar um afnám gjaldeyrishafta og tengd mál, að því er segir í tilkynningu.

Benedikt er 39 ára verkfræðingur frá Háskóla Íslands. Hann starfaði hjá Fjárfestingarbanka atvinnulífsins og Íslandsbanka-FBA frá 1998-2001, Straumi fjárfestingafélagi 2001-2004, sem framkvæmdastjóri hjá Straumi Fjárfestingarbanka frá 2004-2007 og 2008-2011, hjá FL Group 2007-2008 og sem framkvæmdastjóri hjá MP banka frá árinu 2011.

Þá hefur Benedikt sinnt stundakennslu við Háskólann í Reykjavík, Háskóla Íslands og Verzlunarskóla Íslands.

Hann sat í vinnuhópi á vegum samtaka fjármálafyrirtækja sem starfaði á síðasta ári og lagði mat á umfang aflandskrónuvandans og útbjó tillögur um aðgerðir til að afnema höft á fjármagnsflutninga.

Benedikt er kvæntur Ragnheiði Ástu Guðnadóttur, næringarfræðingi, og eiga þau fjögur börn.

Benedikt hefur störf í fjármálaráðuneytinu 21. nóvember.