Icelandair í samstarf um loftskip á Norðurslóðum

Bandarískur loftskipaframleiðandi og Icelandair Cargo hafa tekið upp samstarf til að kanna hvort ný tegund loftskipa geti orðið raunhæfur kostur í fraktflutningum á Norðurslóðum á næstu árum. Hugmyndin er að Ísland þjóni sem flutningamiðstöð loftskipa.

Það eru reyndar bara elstu menn sem muna eftir loftskipi yfir Íslandi því 83 ár eru liðin frá því þýska farið Graf Zeppelin birtist óvænt yfir Reykjavík sumarið 1930. Svona loftfar gæti aftur sést á Íslandi á næstu árum, miðað við viljayfirlýsingu sem fyrirtækið Aeroscraft í Kaliforníu kynnti í fyrradag um samstarf við Icelandair Cargo.

Aeroscraft hefur á undanförnum árum verið að þróa nýja tegund loftskipa til fraktflutninga með stuðningi NASA og Bandaríkjahers og stefnir að því að taka 22 slík skip í notkun árið 2016, eftir þrjú ár. Þau eiga að bera allt að 250 tonn og fljúga á 180 kílómetra hraða en eyða aðeins þriðjungi af eldsneyti hefðbundinna flugvéla á hvert flutt tonn.

Loftskipin þurfa ekki flugvelli og það er ein ástæða þess að bandaríska fyrirtækið og Icelandair Cargo hafa tekið upp samstarf, að kanna kosti þess að nýta Ísland sem miðstöð flutninga með loftskipum í tengslum við námavinnslu, olíuleit og fiskveiðar á afskekktum svæðum norðurhjarans, eins og á Grænlandi, í Kanada og Alaska.

Fyrirtækið er með tvær mismunandi gerðir í þróun; minna skip sem yrði 170 metra langt með 66 tonna burðargetu og 5.700 kílómetra flugdrægi; og stærra skip, 235 metra langt, með 250 tonna burðargetu og 9.400 kílómetra flugdrægi. Flughæðin yrði allt að 12.000 fet.

Gunnar Már Sigurfinnsson, framkvæmdastjóri Icelandair Cargo, tekur fram að engin skuldbinding felist í þessu af hálfu Icelandair, loftskipið sé enn á tilraunastigi og ekki komið í framleiðslu og óvíst sé hvort þessi áform verði að veruleika. Þetta sé þó vissulega spennandi kostur.