Útflutt orka gríðarlega verðmæt

Ekkert bendir til annars en að í boði verði mjög hátt verð fyrir íslenska orku verði hún seld til Bretlands um sæstreng. Eiginleikar ­íslenskrar orkuöflunar gera hana verðmætari en þeir orkukostir sem bjóðast í Bretlandi í dag, sem eru hins vegar verðlagðir í langtímasamningum á þreföldu til fimmföldu listaverði Landsvirkjunar.

Þetta kom fram í máli ­Harðar Arnarsonar, forstjóra Landsvirkjunar, á haustfundi fyrirtækisins í gær.

„Við erum bjartsýn. Flestir sem eru að gera langtímasamninga bjóða ótrygga orku, en það sem Breta vantar er stýranleg orka. Möguleikar okkar til að fá gott verð eru sannarlega til staðar en við vitum ekki hversu  gott það yrði,“ sagði Hörður um möguleika á sölu orku um sæstreng, en margtók fram að óvissuþættirnir í málinu væru fjölmargir.

Fyrir mánuði var gerður samningur við Hinkley Point-kjarnorkuverið um 150 dollara á megavattstund í 35 ár. Bretar hafa verið árum saman að koma þessu verkefni í gang en lentu málinu loks með kínversku fjármagni.

Fréttablaðið spurði Hörð hvort ástæða væri til þess að ætla að Íslendingum yrði boðið lægra verð en langtímasamningar við kjarnorkuver hljóða upp á í dag eða 150 dollarar á móti verðlista Landsvirkjunar sem ­hljóðar upp á 43 dollara á megavatt­stundina.

„Ég veit það ekki. Við erum hins vegar með miklu betri og verðmætari vöru. Þetta er allt háð samningum og ­viðræður hafa ekki hafist,“ svaraði ­Hörður.

Bresk stjórnvöld hafa samþykkt nýja löggjöf um umbreytingu raforkukerfisins og þeir eru tilbúnir til að gera bindandi raforkusamninga í 15 til 35 ár. Stærðirnar liggja fyrir. Raforkuverð í Bretlandi er um 80 dollarar á megavattstund. Þarlend stjórnvöld eru hins vegar tilbúin að borga 150 til 215 dollara allt eftir eðli raforkuframleiðslunnar.

Eins og Fréttablaðið greindi frá í ítarlegri fréttaskýringu í október um ­sæstrengsverkefnið þá er ákvörðun um að leggja sæstreng í fyrsta lagi möguleg eftir nokkur ár og um hana ­verður að nást víðtæk sátt í samfélaginu, að mati ­Landsvirkjunar sem fól Gallup að kanna hug landsmanna til sæstrengsverkefnisins. Kom í ljós að um 60% þjóðarinnar eru fylgjandi því að skoða þennan möguleika en 10% eru á öndverðri skoðun; 30% leggjast ekki gegn því.