Eigandi Adams og Evu ákærður fyrir skattsvik

Eigandi hjálpartækjabúðarinnar Adams og Evu hefur verið ákærður af embætti sérstaks saksóknara fyrir skattsvik í tengslum við rekstur annarrar verslunar í hans eigu. Dv greinir frá þessu.

Er eigandinn, Þorvaldur Steinþórsson, sakaður um meiriháttar skattalagabrot fyrir að standa ekki skil á rúmlega 30 milljón króna skattgreiðslum.

Annars vegar er um að ræða rúmar 24 milljónir vegna vangreidds virðisaukaskatts og hins vegar rúmlega 6,5 milljón í ógreidd launatengd gjöld.

Er Þorvaldi gefið að sök að hafa innheimt skatt af starfsmönnum heildverslunarinnar Aþenu, án þess að greiða hann til hins opinbera.

Hin meintu brot áttu sér stað á árunum 2009-2011 en málið var tekið fyrir í Héraðsdómi Reykjavíkur í dag.