67% landsmanna hafa miklar áhyggjur af verðbólgunni

Í nýrri könnun sem Capacent hefur unnið fyrir Samtök atvinnulífsins kemur fram að 67,4% landsmanna hafa miklar áhyggjur af verðbólgunni. Aðeins 10,5% hafa litlar áhyggjur af verðbólgunni en 22% segja að verðbólgan valdi þeim hvorki miklum né litlum áhyggjum.

Ljóst er að áhyggjur fólks af verðbólgu hafa aukist nokkuð frá því að Samtök atvinnulífsins gerðu sambærilega könnun árið 2005. Þá höfðu 54% landsmanna miklar áhyggjur af verðbólgunni.

Könnun Capacent sýnir jafnframt að 66,3% landsmanna, eða tveir af hverjum þremur eru hlynntir því að gerð verði þjóðarsátt á vinnumarkaði, þar sem lögð yrði meiri áhersla á stöðugt verðlag og stöðugt gengi krónunnar en í stað þess lögð minni áhersla á launahækkanir. Tæp 17% landsmanna eru andvíg þessari leið og jafn stór hópur er hvorki hlynntur né andvígur slíkri þjóðarsátt.

Í könnun Capacent fyrir SA kemur jafnframt fram að flestir (44,9%) vilja að mest áhersla verði lögð á að stuðla að lágri verðbólgu með hófsömum launahækkunum í komandi kjarasamningum, 29,2% vilja leggja mesta áherslu á að hækka laun verulega.

11,7% vilja leggja mesta áherslu á að stuðla að fjölgun starfa, 10,2% að stytta vinnutíma en 4% nefndu annað.

Könnun Capacent Gallup fór fram 10.-27. október síðastliðinn. Könnunin var send til 2.950 manns á öllu landinu. Svarhlutfall var 60% en 1.771 svaraði könnuninni.