170 milljónir í bústað fyrir ræðismann

Utanríkisráðuneytið hefur auglýst eftir húsnæði fyrir embættisbústað aðalræðsmanns Íslands á Grænlandi í blöðum í Nuuk og á Facebook síðu aðalræðisskrifstofunnar. Samkvæmt auglýsingunni verður það að vera á bilinu 250 til 350 fermetra stórt og 170 milljónir eru eyrnamerktar bústaðnum í fjárlagafrumvarpinu. Frá þessu er sagt í Viðskiptablaðinu í dag.

Bústaður þessi er eingöngu hugsaður sem íbúðarhús fyrir aðalræðismanninn. Aðalræðisskrifstofan er í litlu húsnæði við höfnina í Nuuk. Þar starfa tveir starfsmenn og gert er ráð fyrir að reksturinn kosti 55 milljónir á næsta ári. Skrifstofan var opnuð í sumar.

Í samtali við Viðskiptablaðið segir Gunnar Bragi Sveinsson utanríkisráðherra að opnun skrifstofunnar tengist stefnumótun sem var samþykkt á Alþingi þar sem gert er ráð fyrir því að Vestnorræna samstarfið sé styrkt. Að mikið mikil eftirspurn sé hjá Íslendingum eftir því að komast til Grænlands og vinna þar að þjónustu og fleira. Í því samhengi muni skrifstofan nýtast vel. Hann segir skiljanlegt að fólk velti fyrir sér þessum kostnaði og hann telji sjálfur kostnaðinn mikin. Kostnaðinn við rekstur skrifstofunnar telur hann innan marka.

"Varðandi húsakost þá er ekki um auðugan garð að gresja á Grænlandi. Við skoðuðum að byggja hús en það var talið allt of dýrt. Við höfum reynt að fá húsnæði leigt en það er bara ekki hægt að fá húsnæði sem uppfyllir þær kröfur að vera bæði fjölskyldubústaður og vinnustaður eða embættisbústaður um leið," segir Gunnar í Viðskiptablaðinu. Ræðismaðurinn á að geta tekið á móti fólki í húsinu og verið með uppákomur þegar þarf.

„Niðurstaðan varð sem sagt að kaupa húsnæði. Þá er staðan sú að fasteignaverð á Grænlandi er töluvert hærra en í Reykjavík og það eru ýmsar ástæður fyrir því. Það má hins vegar ekki gleyma því að þessi kostnaður mun mynda eign á móti í Ríkissjóði."

Enn hefur ekki fundist hentugt húsnæði fyrir embættismannabústaðinn.