Al Thani telur sig hafa verið blekktan

Sjeik Mohammed Al Thani telur að hann hafi verið blekktur í viðskiptum sínum við Kaupþing er hann festi kaup á 5,01% hlut í bankanum skömmu fyrir hrun hans árið 2008. Þetta kom fram í vitnisburði Jóhannesar Rúnars Jóhannssonar úr slitastjórn Kaupþings í Héraðsdómi Reykjavíkur í morgun.

Slitastjórnin samdi við Al Thani um að hann skyldi greiða 26 milljónir dollara til baka eftir að Kaupþing féll en sjálfsskuldaábyrgð hans var mun hærri.

„Það má túlka viðbrögð hans þannig að hann hafi talið sig blekktan i þessum viðskiptum,“ sagði Jóhannes Rúnar.

„Hann kom ekki með fullar hendur fjár til að greiða þessa peninga. Hann taldi að búið ætti enga kröfu á hann, það kom skýrt fram,“ sagði Jóhannes fyrir dómi og bætti við: „Miðað við viðbrögð lögmanna hans taldi hann sig vera fórnarlamb í þessum viðskiptum.“

Jóhannes sagði að fundað hefði verið með lögmönnum Al Thani áður en honum var stefnt í málinu.

„Við freistuðum þess að ná samkomulagi en það varð ekki. Þetta endaði með að við gáfum út þessa stefnu. Í framhaldinu var samið í málinu. Málið var aldrei þingfest.“

Fengnir voru lögmenn, meðal annars frá Bretlandi, til að aðstoða við endurheimturnar. Aðspurður um hvers vegna slitastjórnin gerði ekki hærri kröfu á Al Thani svaraði Jóhannes: „Við gerðum hærri kröfu á hendur honum en allir sem þekkja til vita að er ekki einfalt að standa í málaferlum í mörgum lögsögum. Sjeik hafði ýmsar varnir í málinu.“