Óvíst hvort staða framkvæmdastjóra SI verði auglýst

Svana Helen Björnsdóttir, formaður Samtaka iðnaðarins, segir óvíst hvort staða framkvæmdastjóra samtakanna verði auglýst. Orri Hauksson, sem gegndi stöðunni síðastliðin þrjú ár, sagði starfi sínu lausu á föstudag þegar tilkynnt var að hann hefði verið ráðinn forstjóri fjarskiptafélagsins Skipta.

Svana sagði í samtali við Fréttastofu RÚV í gær að stjórn samtakanna muni funda um málið í dag.

„Það hefur ekkert verið ákveðið hvort við auglýsum stöðuna eða ekki. Við teljum mjög mikilvægt að þetta sé gagnsætt ferli og þetta sé rétt gert. Þess vegna fer ekkert í gang fyrr en stjórnin hittist á morgun,“ sagði Svana Helen í viðtali á RÚV.